එක්සත් ජාතීන්ගේ තිරසර සංවර්ධන ඉලක්ක ශ්රී ලංකාවට අදාළව 2030 තිරසර සංවර්ධන දැක්ම නිර්වචනය කර ක‍්‍රියාවලිය සාර්ථක කරගැනීම සඳහා අමාත්‍ය මණ්ඩල අනුකමිටුවක් පත්කිරීමට කැබිනට් මණ්ඩලය තීරණය කර තිබේ. ජනාධිපති ගරු මෛත‍්‍රීපාල සිරිසේන මැතිතුමා විසින් කැබිනට් මණ්ඩලයට ඉදිරිපත් කරන ලද සංදේශයක් අනුව කැබිනට් මණ්ඩලය විසින් මෙම තීරණය ගෙන තිබේ.
මෙම අමාත්‍ය අනුකමිටුව කැබිනට් අමාත්‍යවරුන් පස්දෙනෙකුගෙන් හා පළාත් සභා ප‍්‍රධාන අමාත්‍යවරයෙකුගෙන් සමන්විත වන අතර 2030 තිරසර සංවර්ධන දැක්ම සම්පාදනය කිරීම සඳහා විද්වත් මණ්ඩලයක් පත්කිරීමට ද කැබිනට් මණ්ඩලය අනුමැතිය ලබාදී තිබේ. ඒ අනුව තිරසර සංවර්ධන අමාත්‍ය අනුකමිටුව සෑම මාස තුනකට වරක් රැස්වී සංවර්ධන ක‍්‍රමෝපායන් හා එහි ප‍්‍රගතිය සමාලෝචනය කරමින් ඊට අදාළ නිර්දේශ රජයට ඉදිරිපත් කරනු ඇත. මෙම අමාත්‍ය මණ්ඩල අනුකමිටුවට පහසුකම් සැපයීම සඳහා ජනාධිපති ලේකම්වරයා විසින් සම්බන්ධීකාරකවරයෙකු ද පත්කිරීමට නියමිතය.
2030 වසර වනවිට ශ්රී ලංකාව අත්පත් කරගත යුතු සංවර්ධන මට්ටමේ ප‍්‍රමුඛතා හඳුනාගැනීම, එසේ හඳුනාගත් ඉලක්ක සපුරාගැනීම සඳහා කාලරාමුවක් සකස් කිරීම, එම ඉලක්ක සාක්ෂාත් කරගැනීමේදී රාජ්‍ය පෞද්ගලික හා සිවිල් සංවිධාන සතු භූමිකා හඳුනාගනිමින් එම ඉලක්කයන් සාක්ෂාත් කරගැනීමේ ප‍්‍රගතිය සමාලෝචනය කිරීම මෙම අමාත්‍ය අනුකමිටුව මගින් අපේක්ෂිතය.
ශ්රී ලංකාවේ ආර්ථික අභිවෘද්ධිය, සමාජ සාධාරණත්වය හා පාරිසරික සුරක්ෂිතතාවය යන ති‍්‍රවිධ අංශයන් අතර අන්තර් සබඳතා ගොඩනගා ගනිමින් සෑම පුරවැසියෙකුටම ප‍්‍රතිලාභ ලැබෙන ආකාරයට සමතුලිත හා තිරසාර සංවර්ධනයක් ඇතිකරගැනීම මෙම වැඩපිළිවෙළ යටතේ සිදුකෙරෙණු ඇත. එක්සත් ජාතීන්ගේ සංවිධාන මගින් හඳුනාගත් සහස‍්‍ර සංවර්ධන ඉලක්කයන්, ජනාධිපති මෛත‍්‍රීපාල සිරිසේන මැතිතුමාගේ දැක්මට අනුගතව 2015 – 2030 කාල පරාසයන් තුළ ජයගැනීම රජයේ අභිප‍්‍රායයි.
