ඕස්ට්‍රේලියානු රජයේ ආධාර ඇති ව සංවිධානය කරන ආසියානු ක්‍රීඩා සහභාගීත් ව ව්‍යාපෘතිය යටතේ විශේෂ පුහුණු පාඨමාලා ඇතුළත් මළල ක්‍රීඩා පුහුණු කඳවුරු 03ක් ශ්‍රී ලංකාවේදී පැවැත්වීමට කටයුතු යොදා තිබේ.

ක්‍රීඩා අමාත්‍ය නීතිඥ දයාසිරි ජයසේකර මහතාගේ ප්‍රධානත්වයෙන් එහි දෙවන වැඩමුළුව අද (06) වන දින පෙ.ව.8.30 ට පඩුවස්නුවර එස්.ඩබ්.ආර්.ඩී බණ්ඩාරනායක ජාතික පාසලේදී උත්සවාකාරයෙන් ආරම්භ වේ.

ක්‍රීඩා අමාත්‍ය නීතිඥ දයාසිරි ජයසේකර මහතාගේ සංකල්පයක් අනුව 2017 වසරේ සිට ක්‍රියාත්මක කිරීමට නියමිත විදේශීය පුහුණුකරුවන් විසින් ශ්‍රී ලාංකික පුහුණුකරුවන් පුහුණු කිරීමේ වැඩසටහනේ ආරම්භයක් ලෙස ක්‍රීඩා අමාත්‍යංශය හා ශ්‍රී ලංකා මළල ක්‍රීඩා සංගමයේ සහයෝගය ඇති ව අධ්‍යාපන අමාත්‍යාංශයේද පූර්ණ මැදිහත්වීමෙන් මෙම පුහුණු වැඩමුළුව පැවැත්වේ.

සම්පූර්ණ නොමිලේ පැවැත්වෙන මෙම විශේෂ මළල ක්‍රීඩා පුහුණු ව්‍යාපෘතියේදී පළමු අදියර ලෙස ක්‍රීඩා සමාජ පුහුණුකරුවන්ද, දෙවන අදියර ලෙස අන්තර් මධ්‍ය පුහුණුකරුවන්, විනෝද ක්‍රීඩා පුහුණුකරුවන් සහ කිඩ්ස්ඇත්ලටිස්ක් සහ යොවුන් මළල ක්‍රීඩා පුහුණුකරුවන්ද පුහුණු කරනු ලැබේ.මෙම  පුහුණු වැඩසටහනේ පළමු වැඩමුළුව සාර්ථකව 2017 ජනවාරි 3,4,5 යන දිනවලදී ගම්පහ ශ්‍රී බෝධි ක්‍රීඩාංගණයේදී පැවැත්වුණි.