මෙම වසරේ දී ගාල්ල දිස්ත්‍රික්කයේ ග්‍රාමීය යටිතල පහසුකම් ප්‍රවර්ධනය සඳහා ආර්ථීක ප්‍රතිපත්ති කටයුතු අමාත්‍යාංශය විසින් රුපියල් මිලියන 448ක මුදලක් වෙන් කර ඇත.

ඒ යටතේ එක් ගමකට රුපියල් ලක්ෂ 05ක මුදලක් වෙන් කිරීමට නියමිතය. ඒ අනුව යටිතල පහසුකම් සංවර්ධනය සඳහා 70%ක මුදලක් ද, ජීවනෝපාය සංවර්ධන වැඩසටහන සඳහා 30%ක් ද ඒයටතේ වෙන් කෙරේ. 

එසේම 2016 වර්ෂයේ ගාල්ල දිස්ත්‍රික්කය වෙනුවෙන් වෙන් කෙරුණු ප්‍රතිපාදනයන්ගෙන් 100% භෞතික ප්‍රගතියක් අත් කර ගෙන ඇති බවට දිස්ත්‍රික් සැලසුම් අධ්‍යක්ෂිකා පුෂ්පා මලලසේකර මහත්මිය පැවසුවාය. එමෙන් ම නිල මෙහෙවර ජාතික වැඩසටහන යටතේ රු.මිලියන 89.4ක ප්‍රතිපදන යටතේ යෝජිත මාර්ග සහ යටිතල පහසුකම් 100% භෞතික ප්‍රගතියක් අත් කර ගෙන ඇත.

එමෙන් ම දක්ෂිණ සංවර්ධන අමාත්‍යාංශය යටතේ හිමි වූ රු මිලියන 65.09ක ප්‍රතිපාදන යටතේ යෝජිත සංවර්ධන වැඩසටහන් හි ද 100% ප්‍රගතියක් අත් කරගෙන ඇති අතර, ක්‍රීඩා පිටි සංවර්ධන වැඩසටහන යටතේ ද 99%ක ප්‍රගතියක් අත් කර ගෙන ඇති බව සැලසුම් අධ්‍යක්ෂවරිය වැඩිදුරටත් පෙන්වා දුන්නා ය. 

ගාල්ල දිස්ත්‍රික් සම්බන්ධීකරන කමිටුව ඊයේ (23) සම්බන්ධීකරන කමිටුවේ සම සභාපතිවරුන් වන දකුණු පළාත් ප්‍රධාන අමාත්‍ය ශාන් විජේ ලාල් ද සිල්වා සහ පාර්ලිමේන්තු මන්ත්‍රී විජේපාල හෙට්ටිආරච්චි යන මහත්වරුන් ගේ ප්‍රධානත්වයෙන් පැවැත්වූහ.